Apinara

营业中

休息中

之前已經食過尖沙咀lady nara 同Nara thai, 今次咁啱約咗表姐喺金鐘太古廣場行街，所以夜晚就嚟食呢間集團旗下嘅另一間泰國嘢，同樣都係米芝蓮嘅泰國菜。入面店員服務都幾好，環境舒適啱晒一班朋友聚會傾偈，又唔會太嘈，我哋點咗椰子雞湯，呢個椰子雞湯係純白色，飲落清甜，好香嘅椰奶味，夠特別。之後去食泰國嘢點少得要點咖喱同薄餅，呢個配搭簡直係絕配㗎。我哋點咗紅咖喱牛肋肉，份量原來有好多，佢有五條牛肋肉，啲肉炆咗36個小時所以好入味好淋，再用薄餅點咖喱汁，10分惹味。我哋仲咗個軟殼蟹芒果米紙卷，軟殼蟹大大嚿揸得好香脆，同芒果好夾，夠清新。最後點少得要點過甜品呢呢個甜品真係10分推介佢係椰子冰再配上各種唔同嘅泰式甜品配料，椰子冰清清淡淡，喺夏天消暑一流能夠一解食完咖喱嘅飽滯感。下次都要必點呢個甜品。