心之食堂 (裝修中)

之前去百樂中心食嘢嘅時候，已經留意到呢間心之食堂，今日咁啱行完銅鑼灣，就決定食佢啦。裝修同座位都好舒服，氣氛唔錯。一打開落單App，已經俾佢嘅邪惡包吸引住。紫菜入面包咗沙律菜，燒帶子入面又包咗鵝肝，賣相同口感都好豐富，好食。每次餐廳有刺身都一定忍唔住嗌嚟食。今次要咗油甘魚同三文魚各5切，上枱嘅時候真係幾驚喜，厚切嘅刺身大件又新鮮，好滿足。另外要咗彩虹卷，入面有炸蝦同青瓜，特別嘅係外面有芝麻，即刻香口咗好多。串燒方面要咗煙肉荔枝卷，落單嗰陣以為係荔枝肉，點知原來真係煙肉包住荔枝肉嚟燒。荔枝嘅甜味同煙肉嘅鹹好夾，互相中和，好特別。燒雞皮好脆好香口，有少少鹽係上面，感覺會好啱送酒。燒日本番薯甜甜哋，如果個皮再燒得脆少少就再好食啲。鹽燒鯖魚好大條好香，一啲都唔腥，好快就食哂啦。吉列炸蠔有5粒，粉唔算厚，蠔肉唔會腥。蟹肉忌廉餅外脆內熱，鍾意食嘅可以試吓。最後因為炸物有啲多，所以要咗杯熱嘅檸檬果茶。大大杯好暖胃，入面仲有好多檸檬果肉， 感覺好健康，好好飲。