顏府御膳 (已結業)

其實我都真係幾鍾意食中菜，今次特登嚟呢間精緻嘅中菜餐廳度食晚飯。茶方面我揀咗菊花茶，飲落清香。鮑汁鳳爪鮑汁鳳爪煮得好淋好入味，有好多隻，食落有滿滿嘅骨膠原。仲有好多花生添。滕椒木耳鍾意食辣嘅朋友一定會鍾意食呢個滕椒木耳，香辣麻辣味十足，木耳爽口，係一道出色嘅涼拌前菜。青紅蘿蔔螺頭煲雞腳呢個湯好足料，飲落味道好香濃。青紅蘿蔔都已經煲到淋晒，雞腳同螺頭嘅精華都已經煲晒出嚟。一定要趁熱飲，真係好好飲。鐵板鮮沙薑陳皮生煎雞呢款生煎雞首先係喺鐵板上面嘅，上枱嘅時候店員會幫我哋將生煎雞由鐵板搬上碟，以免我哋辣親手。啱啱放上碟上面嘅生煎雞都仲有滾緊嘅咋咋聲，新鮮滾熱辣。食落沙薑味重，雞皮香脆，雞肉嫩滑。羊肚耳珍菌濃湯浸時菜蔬菜嘅煮法有好多種，我最鍾意就係上湯浸嘅，不過前提係個上湯一定要好味。呢個上湯，好味啦，搞到我都忍唔住飲咗幾啖。娃娃菜浸晒喺呢個香濃嘅上湯入面，索晒啲味，好正。有多款菇類，食落爽口，正。呢度嘅中菜真係好精緻，味道出色，環境又舒適，下次再嚟先。