金紫荊生記粤菜廳

营业中

休息中

行完會展老闆話請食飯，梗係試下會展嘅粵菜廳。餐廳裝修係典型嘅粵菜特色，大圓枱加米白色枱布，不過最特別就係望住會展個海食飯。焦糖黑毛豬叉燒上檯嘅時候有蠟燭係底熱住個叉燒，所以keep住聞到好香嘅焦糖味。叉燒入口有淡淡嘅焦糖甜味，叉燒肥瘦適中，唔會好膩又唔會好乾身。每舊都有小小燶邊位，好香口。懷舊雞蛋焗魚腸呢個菜已經好耐食過，魚腸嘅鮮味唔會蓋過雞蛋嘅嫩滑，面個層焗到脆卜卜，入面又好嫩滑，魚腸處理得好好，唔會有腥味。火焰雞個雞一出場就大家趕住去影相，見有層厚厚嘅鹽包住，以為食落似鹽焗雞，但佢又出奇地嫩滑鮮味。雞皮金黃色，一啲都唔肥，雞肉又嫩又滑，焗嘅時間控制得啱啱好！黃老太梅子蒸蟹見到啲梅子醬同蟹膏就食指大動，咬落去啖啖肉！梅子醬同蟹嘅配搭我都係第一次試，食落有好香嘅蒜味，梅子醬唔會搶左蟹嘅鮮味，反而愈食愈香。香蔥鮑魚砂鍋焗飯鮑魚切粒撈埋啲飯一齊焗，成煲飯都好香嘅鮑魚味，食落啖啖都有鮑魚粒。每粒飯都有汁包裹住，又唔會太鹹。焗飯嘅關係有時愈食到飯焦，係成個焗飯嘅精髓。金湯舞茸玉荷苞金湯好燶，有好重嘅南瓜味。菜入面包住左啲菇，食到有淡淡嘅牛油味。