茶茶GO (已結業)

今日同朋友喺灣仔附近行街，行到攰見口渴，就睇吓附近有啲咩好飲。去到灣仔道嗰陣就見到呢一間茶茶GO，見佢選擇都唔少，於是就嗌咗兩杯嚟試吓。見到佢有個飲品排行榜，參考咗之後，我哋分別嗌咗上榜嘅金煌楊枝甘露沙冰，同埋草莓蜜蜜酸奶。先講楊枝甘露沙冰，唔好以為係沙冰就會好淡味，相反非常之濃嘅楊枝甘露味，亦都加咗芒果肉，增加咗口感。同時亦都見佢加咗椰奶，似足楊枝甘露咁。而底嗰度亦都有啲愛玉凍，好好咬口，令成個口感更加豐富。另外朋友叫嗰杯草莓蜜蜜酸奶，評價都唔錯。我試飲咗幾啖，草莓味好濃，一啲都唔係平時好假嘅化學草莓味，而係真係新鮮水果味，而酸奶亦都好好飲，酸味適中，好似飲緊濃郁版Yogurt。成個配搭都好清新。舖頭除咗有茶飲之外，亦都見到佢有個凍櫃擺放一啲巴斯克芝士蛋糕同埋近排大熱嘅肉鬆小貝，有機會我都會想買來試食吓睇吓好唔好味。如果下次再經過灣仔，我會想試吓佢另一大熱嘅芋頭牛奶，望落都幾吸引。