老趙越南餐廳(大頭蝦專門店) (已結業)

尋晚加班到9點﹐跟同事3人去山林道老趙食晚飯。去到唔需要等兼且有好多位﹐似乎“老趙”的大名已經不復當年勇。叫左咖喱牛腩煲﹐蒜蓉包﹐炒芥蘭﹐豬肉濱海﹐春卷同雞翼。咖喱牛腩煲上得最快﹐落完ORDER唔夠5分鐘就有﹐好彩味道都算唔錯﹐椰汁咖喱夠香﹐整體上亦夠熱。其實咖喱唔怕預先整好﹐只怕上檯時唔熱。蒜蓉包亦差唔多時間送上﹐否則就得個睇字。唯一可惜牛腩比較“散”﹐要扣返少少分。食完覺得蒜蓉包其實麻麻地﹐比較細件亦唔夠蒜香﹐早知要普通法包好過。豬肉濱海份量足﹐用作包濱海的生菜同香葉亦算新鮮﹐但米粉團就應該係預先擺定落碟的﹐已經定左型﹐頗“實淨”..包起上黎有少少困難。最後放棄生菜包的食法﹐只將所有料放入碗中再落甜酸魚露撈勻再食﹐一樣得﹐又方便。春卷夠脆又夠大但味道較淡﹐想好食要靠越南菜之寶-- 魚露。而由於春卷SIZE 較大﹐新鮮生菜又脆﹐所以同濱海一樣係難以包住黎食。越式春卷我都係比較喜歡較小型的。香茅雞中翼就做得唔錯﹐又香又熱﹐脹卜卜咬落去啖啖肉﹐肉汁亦保持到﹐成晚最好食係呢樣。炒芥蘭就水準一般﹐唔算差但又無甚特別值得推介的理由。連啤酒﹐埋單約$300。講貴唔算貴﹐亦唔係難食﹐比起兩年前我最