麵鮮醬油房周月 (歌賦街)

营业中

休息中

係寫詳細食評之前，先大膽黎個開估，對本人而言，周月係我香港食過沾麵暫時排名第一！香港依家都有林林種種唔同既拉/沾麵店，但好多都係借其名，但完全得唔到日式拉麵既精髓。麵鮮醬油房周月 呢次係本人第一次幫襯，但已經比佢深深勾住左魂魄。呢日係跟住我一位視食如命既朋友搵食，出奇地唔洗排好耐隊，等左大概5分鐘就入得。店員十分有禮貌，主動地添水同埋遞上menu。Menu都幾特別，用木牌造成，好有日式既味道。如一般沾麵店一樣，會有圖畫指示沾麵既地道食法，簡單易明。朋友推介兩款主打沾麵。有辣有唔辣 任君選擇。湯底可揀濃淡，麵條可揀冷熱，食客可以彈性揀選自己鐘意既口味。另有3款份量 價錢一樣。新手初試，揀左普通沾麵，淡湯底同熱麵。份量方面，身為男子漢 當然係揀左特盛300g。湯頭係用秘制醬油做主調，再加各種魚粉、海帶長時間熬製 烹調而成，鮮味十足。對於香港人口味而言，清淡湯頭既鹹度剛剛好，麵條煙韌彈牙 掛上湯汁，一啖接一啖 完成300g絕對係輕而易舉。當中既叉燒都不禁令人為之一讚，切成肉條狀，肥瘦比例剛好。以呢個價錢 周月沾麵絕對係物超所值。我呢位視食如命既朋友果然冇介紹錯。