街坊Cafe (已結業)

今晚同朋友相約係旺角食飯，係女人街側邊啲店舖搵食，經過呢間餐廳覺得個名幾搞嘢於是入去試食。餐廳內牆七彩繽紛，好有藝術感，圖畫亦好有意思。食物包羅萬有，有選擇困難症嘅我地最後揀咗咩都有得試嘅二人餐。吞拿魚蟹籽沙津配日式芝麻醬冇得輸。碗仔翅。大大碗上，可以分到好幾碗，味道唔差得嚟仲好足料，仲有素鮑參，勁呀!意式蜆肉河粉。將西式意粉煮法轉成煮河粉，嚟個mix & match，夠曬特別。河粉比想像中好，唔會太腍，蜆肉都幾多，配埋個蕃茄汁酸酸甜甜好開胃。鐵板黑毛豬。熱辣辣，好肥美，食落好腍好軟，唔點醬汁都好夠味，食埋粗薯條好滿足。女神，果汁嘅酸甜，啱曬食完有啲Heavy嘅黑毛豬飲。你的男人，係意大利極濃/朱古力，啱曬啲鍾意甜中帶有少少苦嘅人。Tiramisu吉士西多士伴雪糕。凍嘅雪糕加上熱辣辣嘅吉士西多士，仲有好甜嘅爆谷，棉花糖同Tiramisu，好邪惡呀。埋單$339，呢個價錢食到咁多嘢都幾化算。