顏府御膳 (已結業)

首嘗銅鑼灣精緻清新私房中菜～～～餐廳位置喺銅鑼灣，比較高級嘅地帶，附近環境安靜，好多名店，上到嚟成個感覺都幾有氣派。成個裝修嘅感覺有少少似私房菜，幾精緻。～～～金沙脆豆腐：外脆內嫩嘅粒粒脆豆腐，令我哋忍唔住一口接一口咁樣食，雖然係脆嘅，但係食落去整個感覺唔算太熱氣，而且佢哋可以揀菊花茶飲，配搭菊花茶底下，整體平衡得幾好。～～～青瓜海蜇頭：海蜇爽脆而且係用頭嘅位，大大嚿，好有咬口，加埋冰凍嘅青瓜同埋雲兒等等，味道開胃，頗舒壓嘅感覺。～～～🥣食完前菜之後我哋再叫咗兩碗老火湯飲，返工壓力大嘅人係需要有湯水滋潤一下。我哋揀咗去濕嘅粉葛鯪魚湯，湯水煲得幾濃郁，加埋沙沙地嘅粉葛口感，不錯，飲落去感覺冇味精。～～～蟹肉桂花炒瑤柱：由於唔算太有胃口嘅關係，我哋冇叫到粉麵飯，取而代之嘅係叫呢一碗蟹肉桂花炒瑤柱黎做主食。佢哋炒得唔會太油膩，蛋香好重，加埋芽菜瑤柱同蟹肉，整個配搭，低卡高蛋白，食落去有飽肚感之餘，又唔會太多碳水化合物，幾適合減肥嘅人食。～～～🥬羊肚耳真菌濃湯浸時蔬：我哋最後仲叫咗一個菜黎令到成個晚餐更為健康，平時大舊係唔鍾意食蔬菜嘅，但係呢度嘅菜就整得好夠味。浸喺上湯入邊嘅娃娃菜食落分外香甜