天園餃子 (已結業)

餃子界一直聽左天園、甜記呢d名好耐，終於觀塘開左新分店。素餃一向都感覺較清淡唔岩口味，見番茄蛋餃出名都試下，估唔到入口好似食緊蝦肉餃咁，蛋餡夠哂嫩滑香甜，居然係全晚最有驚喜既一款。韮菜餃同紹菜餃正常發揮，紹菜比一般食到既甜，整體食材好新鮮，皮薄餡靚。值得一提兩碗餃子湯底唔同，應該係素餃、肉餃之分，感覺好有心機。 素餃配既黑松茸菌湯好鮮甜，同出面打邊爐既湯底一樣咁好味，肉餃就配蘿蔔湯，同樣清新。餃子餐可加配小食，揀左炸雞翼，新鮮炸起又入味，好食過脆香雞翼。 單點酥炸豬扒都出色，香脆得黎唔油膩，係咸左少少配麵好d，睇黎呢度炸野都有咁上下水準。因為疫情關係收起左菜莆，記得一定要問店員拎，蝦米同辣椒香好不得了。 自問食得辣都頂唔住個菜莆，但佢就係明明好辣都會令你頂唔住繼續食，所以叫多左個手撕雞麵，用菜莆撈麵辣度岩岩好，驚喜發現撈落湯底係驚為天人，必定encore。