芝加哥串燒 (美豐花園) (已結業)

琴晚同個fd去大埔搵野食，又去左間之前食過另一間串燒既呢間分店。今次呢間店有啲唔同，個餐牌野食完全唔同，咁又試下啦，我同朋友每人都叫一杯啤酒先，店員見我地係女仔，極力推介我地飲一款似cider既蘋果味果酒。咁又試下先，飲落好香果味，而且好易入口，酒精唔會好高，岩我唔太鍾意高酒精濃度既人飲，真係一飲飲唔停。呢間野原來主要食西餐，我兩個女仔見到樣樣都想叫食。小食、意粉同牛排都叫左，慢慢食可以傾計。第一款炸菇配黑松露醬，食落個炸粉漿好鬆脆薄身、點落黑松露醬度成個味超夾，飲埋啤酒真係食唔停🥰第二係紅酒燴牛脷，牛脷炆到好淋、好好味，仲有埋薯條食添。第三係茄汁蝦意粉，幾隻蝦都好大隻，蕃茄醬既味係食得出新鮮既茄肉配搭，所以食落唔錯！最鐘意就係個主菜，煎牛扒。全部野都係即叫即整既，所以個排都係新鮮整出尼，係用上靚既牛去煎，肉質好好、好有牛味，連對牛好挑剔既都好鐘意呀！有埋燒波羅、牛油薯角一齊食係好match架，份量好足，正！間野一路食一路有埋酒飲，仲有電視播桌球比賽，下次可帶埋男朋友/其他來吹水食下野！