廣東燒味餐廳 (已結業)

今日落雨，又凍凍地，唔想煮飯食咪搵埋女朋友同世伯伯母落街食囉。咁元朗最就腳一定係大馬路啦，我提議食番廣東燒味餐廳啦。門口又係個位熱情叔叔，燒味依然係咁靚！坐低叫左個菠蘿京都骨、西芹腰果炒肉丁、再黎半隻琵琶鴨。先講個菠蘿京都骨，因為太香啦！未影相已經俾大家瓜分左⋯⋯味道無令人失望，酸酸甜甜好開胃！再黎西芹腰果炒肉丁，啲西芹同腰果都好脆好入味，美中不足係啲肉丁太淡啦。老闆話因為今日啲肉醃得唔夠，所以都話唔好意思，所以私人醒我地食個粉絲煲。粉絲煲超入味！賣相就好似武林高手咁，深藏不露。食落就知功力深厚！粉絲爽得黎唔乾，有汁得黎又唔膩，送飯一流！最後係主角琵琶鴨，想像下乳豬皮同燒鵝脾嘅混合體就知咩味。唔講太多，自己品味！最後有一樣野好值得讚賞，平時落雨，一入啲普通茶餐廳，一定成地水。而廣東咁多客出出入入，地下都咁乾爽，好舒服！