因而喺某媒介睇到人食龍蝦剌身, 引到我口水長流, 所以諗起全記, 因為呢度上次食嘅象拔蚌剌身好正, 相信啲龍蝦剌身都唔會差得去邊, 所以就趁放假去食!!!!
嘩!!!到咗全記, 真係同上次閒日嚟相差好遠!!!上次閒日嚟就會被其他食店嘅店員拉晒手入去店舖入邊, 但係喺星期日入去同一地方, 啲侍應根本忙到不可開交, 完全唔會有人得閒拉你入去!!!!!好彩入得好晏, 所以唔駛等都有位!
坐定後, 就立即落番地下嘅魚池睇下有咩好食!當然, 第一時間睇下啲龍蝦同象拔蚌仲有無啦!!!!無錯!係睇下有無而唔係睇下靚唔靚, 因為真係好旺!!!今日令我最失望嘅係無海膽剌身, 上次食過, 真係好正!!!
有個女賣手問我幾多人食, 我話得兩個咋! 佢就立即同我搵咗一隻一斤半嘅象拔蚌同一隻兩斤多啲重嘅龍蝦比我睇, 完全無話特登搵啲大大隻嘅掠我水, 抵讚!!!!我重要話隻象拔蚌咁細可能唔夠食, 佢同我講「夠架啦, 你得兩個人食, 仲要食下其他嘢架嘛! 無理由只係食啲涷嘢架!!!生冷呀!!!」嘩!!!!呢番說話真係體貼, 而且俾到我一個非常好嘅印象, 就係佢哋唔係掠水嘅!!!!!佢仲提我, 話個龍蝦兩食架嘛, 個頭另外整多一味架, 你食住先啦! 我先醒起: 係噃! 咁就聽晒佢話, 食住先啦!!!
另外, 今次難得見到喺度見有人推介白酒及紅酒, 正, 正合我意!因為可以飲住白酒食剌身, 除咗匹配之外, 又可以食真啲象拔蚌同龍蝦剌身嘅分別!!!!!等咗15分鐘左右, 兩樣剌身先後奉上, 一上枱, 真係唔能夠唔讚呢度切剌身嘅師傅嘅手勢, 估唔到一隻只得斤半嘅象拔蚌可以切到50多片, 而隻咁細嘅龍蝦, 都可以切到差唔多20片, 好!!!!! 象拔蚌剌身食落係一貫嘅鮮甜, 而龍蝦剌身嘅味道就無象拔蚌咁搶, 因為本身嘅味係咁, 但係就非常清甜, 兩樣都係非常新鮮!!!!!慢慢一路食, 一路飲白酒, 真係人生一大享受!!!!!
慢慢食咗成個鐘, 就再落魚池睇下有咩好食。見到啲蟹同貴妃蚌幾得, 所以就叫咗個油爆重皮蟹同粉絲蒸貴妃蚌。第一個嚟到嘅係召鹽龍蝦頭抓,一上枱就聞到香氣撲鼻, 食落就估唔到咁細隻龍蝦嘅頭會有咁多肉食, 之後, 就係蟹同貴妃蚌, 貴妃蚌我就略嫌細咗咗少少同鮮味唔太夠, 而隻蟹就更估唔到會係咁細隻, 但係就幾好味!
總括嚟講, 呢度嘅海鮮同去鯉魚門食嘅話, 價錢差得遠, 因為去鯉魚門嘅話, 我就有比人掠水嘅感覺, 從來無人會話俾你知你叫嘅嘢食嘅斤兩同價錢係幾多, 直到你埋單先知! 而味道方面, 我就更認為西貢呢度貨真價實!!!!!尤其係喺全記食象拔蚌剌身, 就算細隻都好, 師傅都可以起到好多片俾你, 但係SIZE又唔會太細!況且, 係度食, 完全無比人掠水嘅感覺!!!!以後要食象拔蚌剌身, 呢度係我不二之選!!!!!!!
