船皇 (厚福街) (已結業)

今年應該都冇得去旅行，所以留喺香港消費都特登搵啲唔同國家嘅嘢食。係附近商場行完，黎左厚福街，好多舖頭都要等位，被呢間專食船麵嘅專門店吸引左！好似幾抵食咁！叫左一個撈麵一個湯麵再加一啲串燒。船皇湯麵🍜加一蚊升級左做和牛🐮可以揀唔同麵底。我地要左河粉，配料有牛腩，牛肉丸，雞絲，雞翼，豬肉，豬肉丸，豬潤，超級多配料啊！一上菜已經聞到碗麵好香，飲下啖湯先，超級香濃！佢條河粉超大篇唔係幼身個種！吸收埋湯底啲味道真係好正！加咗一蚊嘅和牛，雖然唔知來自邊度，但都好好食，肉質好嫩！食到最後我差唔多飲晒啲湯底🤣🤣🤣雞絲雞翼撈麵，我揀咗蛋麵，撈麵汁都唔錯嘅，甜甜地，幾開胃！但係同個湯麵對比就真係比下去！十分推薦湯麵超好食😋至於串燒方面，叫咗魷魚鬚，牛舌，豬頸肉，有三種醬汁可以揀，泰式辣汁，沙嗲醬，泰式燒烤醬。三個之中我覺得燒魷魚係最好食嘅，我哋揀咗泰式燒烤醬，我最鍾意呢個醬汁，甜甜地好好味！另外牛舌配左泰式辣汁，辣汁唔算好辣，係好惹味既！豬頸肉就得一條，不過好鍾意佢個油脂香味😛最後仲叫左青檸梳打，飲品唔算特別但係特別之處在於佢用一個泰式碗裝住，個碗超級冰涼好得意！見到下午茶時間都好抵仲有小食送，回頭率極高