MEMOIR (已結業)

今日同朋友去咗銅鑼灣食飯行街，上網搵到哩間餐廳，見佢哋餐牌同佈置都好有心思同格調，環境亦舒適寧靜，所以就嚟試吓。去到餐廳門口，已經忍唔住打開相機，影低靚靚嘅聖誕佈置。裡面環境舒適，帶點點浪漫同文青感覺。我哋叫咗兩個主菜同兩杯飲品，食物質素真心高，有誠意、有用心嘅製作。日式海膽忌廉帆立貝意大利粉 $198賣相非常吸引，大大隻帆立貝同大貝殼，連隻碟都靚過人，好啱打卡用。味道水準亦十分高，海膽忌廉汁香滑濃郁，味道鮮甜，意粉煙韌有嚼勁，除咗做到al dente嘅口感外，亦做到掛汁嘅效果。帆立貝好有份量，鮮味十足。燒西班牙乳豬配蘋果蓉 $318乳豬皮燒得脆卜卜，非常香口。肉汁豐富，肉味香濃。肉質亦鮮嫩，唔會嚡熠熠，配上清甜的蘋果蓉，味道更鮮更有層次。薯仔燒得非常香口，好想食多幾舊，番茄仔亦好多汁新鮮，正！Fresh Lemonade $48新鮮清爽，散發住陣陣檸檬香氣，精神為之一振。Hojicha $28冬天嚟一杯熱茶特別有幸福感。焙茶甘香，味道溫和，香氣濃郁。