炑八韓烤 (已結業)

先幾日下午去新都城呢間炑八食野，食物質素唔係話好好，算普通野，其實食物質素唔特別差的話，客人試吓都得嘅，但侍應服務唔得就好難令人返轉頭食。當日我見有個order等太耐，諗住叫侍應取消，於是叫左個高高地set晒頭嘅男侍應取消啦，一叫佢已經個樣串串地咁，再提出取消要求，佢即時就同其他同事大大聲講：「個靚仔話想取消order喎」，我即時覺得佢態度好有問題，幫人客取消咪取消，叫咩靚仔呢？我見呢度裝修都叫幾高級，但感覺好似仲差過去茶記大排檔，於是我問個高級d嘅唔知係咪經理，投訴佢地點教員工，可以咁無家教，觀察成間都係後生仔，主力想做到有活力，但個個後生員工唔係玩就聚埋吹水，無人做野，叫佢地做野就咁黑面服務態度，如果比呢類後生仔搞壞名聲，就算好好食都唔會再幫襯。