瀛豐放題料理專門店 (已搬遷) 新店位置

今晚去銅鑼灣食放題，揀左近期新開嘅瀛豐放題料理專門店，位於京都廣場10樓，銅鑼灣地鐵站C出口對面就係，非常方便！入到去環境唔算大，但都坐得舒適，佢哋落單唔係用紙，係用QR code掃描落單，夠曬環保，而且上菜速度都幾快！加$88可以升級任食生蠔、帶子海膽，生啤！自助啤酒好有趣，放杯上去再用力按住就會發光幫你斟啤酒～海膽帶子又係非常新鮮，就算唔係加錢嘅刺身，帶子都係大粒嗰隻，不過切開左。仲有牡丹蝦、馬刀貝、象拔蚌呢啲比較貴價刺身！我最鍾意食佢個魚露燒海蝦，燒到脆卜卜，好似連皮都食得咁！蝦肉新鮮爽脆，連續點左幾轉～仲有好多泰式料理，不過我來講都係有啲辣度！炒通菜幾有鑊氣！泰式燒帶子係唔辣嘅，蒜味幾香，但燒得有啲乾身。醬鴨係煙熏鴨嘅味道，煙熏味濃香，但口感偏硬。甜品同雪糕各有一個專櫃，雪糕仲有杯裝gelato，但食得太飽都無再食～整體感覺食物質素唔錯，只係款式較少，有機會都會同朋友再黎！