名館 (已結業)

放工同老公拍住拖由中環街市嘅石板街行到擺花街，揾到間中菜館食晚飯，上到間菜館見藍、白、啡黃為主，色彩鮮明，摩登得嚟又不失傳統，座位寬闊，一大群人相聚，抑或三五知己傾計，都有足夠空間感；海葡萄沙律菜，自己好少煮海葡萄，知道營養價值好豐富，所以覺得好珍貴；糖心黑蒜燉響螺，真材實料嘅湯放向功夫茶壺，慢慢以杯仔飲用，好寫意；鮮肉一口小籠包，唔好以為一口好細咁，其實同出邊坊間嘅差唔多大細，有少少肉汁，味道尚可；脆皮燒鵝，例牌有四分一隻，放向精美保溫蠟燭瓷器上，高級非常，可惜鵝皮唔脆，但夠肉味；詐糊，即椰汁桂花糕，賣相無得輸，係呃like至尊，米糊做成嘅米紙，用食用墨打印成美金及人民幣，像真度極高。