番本日式放題 (已結業)

10年無食過放題喇，哩日放工決定去放肆下！對上一次食哩間野已經係5年前，今次食狀態唔係咁好，前一日肚痾，所以都無咩掂生冷野！因該已經係8點半，超餓，叫左個鰻魚飯打打底，但無諗過一份係大碟到咁，味道唔錯，有鰻魚汁味，但係食唔到鰻魚，同埋太大碟喇，懷疑佢俾錯左我，食完哩碟仲點食野？南瓜天婦羅係我最愛，新鮮熱辣，唔會皮肉分離，南瓜軟滑香甜，食左6件！牛油粟米都係我最愛，牛油味重，不過真係新鮮先好食，我有半兜放埋一邊唔記得食，食番已經又乾，油又瓊哂！最後食左4碗！雞翼不過不失啦！餃子炸得香脆，不過無醋點黎食爭咁少少！雞軟骨食唔停口，又香又脆，骨唔會硬， 不過無檸檬伴住爭d。三文魚骨腩有驚喜，唔算多骨，肉唔會過老。最後食埋哩個海鮮蒸鍋，出面食好貴架！海鮮新鮮，肥牛唔係港式牛咁厚同韌，反而又薄又唔會肥，唔錯！仲有無限綠茶味香芋味雲尼拿味雪糕糯米糍，我都忍唔住食左幾粒！今日我靜係食左熟食，應該就唔抵架啦，不過整體食物都幾好，3個人俾左個卡位我，都坐得舒服！