阿來泰式地道風味

营业中

休息中

同朋友係旺角隨便揀一間餐廳試，原來係當區名物？餐廳細小，大概只有30個座位。我6點前入座等朋友，唔夠15分鐘門外已經開始排隊。聽到通知等候人士90分鐘用餐時間，齊人入座等等。幸好有善、好笑容又好禮貌嘅阿姨們無特別催促或者比壓力我哋，仲招呼周到。食物方面 - 泰式柚子鮮蝦沙律︰泰式醬汁微酸開胃，加上花生碎粒、少許芽菜、炸脆粉等，多重口感而且味道豐富。兩隻爽彈大蝦仁，入口滿足；下層舖滿大量西柚，清新香甜，所有配料混合後好夾，係自家獨有味道。泰式明爐蒸烏頭︰好大條烏頭，明火熱辣辣邊煮邊食。魚脂香濃、肥瘦平均、肉質鮮嫩滑溜。周邊佈滿配料，菇、甜酸菜、香蔥條、紅椒絲、芫荽，將湯底精髓昇華，魚肉再吸收湯汁十分惹味。原條燒魷魚筒︰大條魷魚經燒烤後邊位微微焦黑，特別爽脆惹味。沙嗲雞豬串︰雞脾肉串嫩滑，外層烤得脆卜卜帶焦香。豬肉串質地鬆軟，輕微豬酥香。配上豐富爆濃花生醬沙嗲汁，甜咸度適中，第一次食到的獨有味道，性價比極高。總結︰無論食物味道、食材質素、菜式份量、服務態度等都性價比高。特別建議改善地方︰餐具筷子、匙羹、餐桌都有明顯污漬，要自行用消毒紙清潔一次先可以使用。