小南國 (已結業)

光顧過小南國兩、三次。每次食完飯都一肚氣，食物無乜特別，唔算差但亦唔算好味。但係如果咁一般的食物，配上咁差的服務，答案係除非你鍾意貼錢買難受，如果唔係，我勤你都係唔好去。最近一次幫襯係一個星期日中午，去到帝國中心，見到好彩同鳯城都大排長龍，但因同行有老人家，唔想等太耐，見到小南國竟然無人排隊，仲有好多空枱。於事俾多次機會佢。門口的知客態度都幾好，但係其他仕應生態度都係照舊。寫菜時我地問位小姐有乜菜，佢好快咁講咗好菜名，我其中聽到莧菜，就點莧菜。點知轉頭佢又話無莧菜。咁之後我地叫豆苗，佢話有，咁佢問我地D菜想點煮？咁我地話想蒜蓉炒，佢話冇。只有上湯煮，無其他煮法。咁我問佢，無理由厨房無蒜頭。果位仕應斬釘截鐵話：「冇」。我地覺得佢答得咁侮氣，都已經掃晒興。都已經食到差不多完，個仕應先至返黎同我地講話佢問過廚房，話可以蒜蓉炒豆苗。嘩！心諗真係唔該，唔好遲D？！我正式blacklist咗呢間小南國。以後唔會再幫襯。