大壹燒鵝 (啟田大廈)

营业中

休息中

係香港地成日都會食得到燒鴨，但燒鵝就唔係間間舖頭都有，好食嘅更加買少見少，今次就搵到嚟藍田食一間以燒鵝為主既鋪頭，做好安心出行同埋量體溫就安排入座，一入餐廳就覺得地方好大、環境好乾淨，比起一般食小菜嘅店舒服得多。嚟到呢間餐廳點可以唔試吓食燒鵝，因為我地人唔多嘅關係，所以就咁叫咗個燒鵝下庄就夠。燒鵝上枱賣相好靚，鵝皮燒至色澤鮮明，鵝肉肉味重而且新鮮，應該燒完無耐就上枱，唔會食到擺左好耐果啲霉霉地既味道，鵝皮燒至脆身，咬落口除左脆之外，仲帶有些少油脂，食落口相當滿足，配埋酸梅醬一齊食簡直絕配！除咗燒鵝掂之外，其他小菜同樣出色，呢碟豆豉鯪魚炒油麥菜鑊氣十足，菜身炒至乾身上枱，豆豉鯪魚量多，相當足料，菜身嫩滑唔老，就咁呢味餸都夠送飯！仲有叫咗個瑤柱黃金炒飯，炒飯鑊氣同樣相當十足，飯粒炒至乾身而且粒粒分明，配埋鹹蛋黃碎嚟炒，令其賣相真係好似黃金一樣，再加上瑤柱碎，令炒飯既層次感更多，讚！