大瀛喜日本料理 (已結業)

就喺openrice呢度, 見到呢間大瀛喜嘅食評大部分都係笑面, 相信應該信得過, 而且從食評啲相睇起上嚟的食物都應該唔差, 於是就膽粗粗咁同幾個姊妹去試下, 事關其中一位姊妹係玻璃肚, 如果啲嘢唔掂的話佢會好大劑, 所以我真係有啲心驚膽顫。第一件事梗係嗌魚生先, 魚生食起上嚟正正常常, 可以老土啲咁講係魚有魚味, 蝦有蝦味, 魷魚有魷魚味, 我自己就覺得三文魚同埋蝦係最好食, 但係油甘魚我就覺得唔係太好, 不過都仲可以話係OK, 最起碼冇乜雪藏氣味。跟住唔使問阿貴, 就梗係嗌壽司啦, 壽司算係正正常常, 味道普普通通, 起碼夾起上嚟唔會散, 事關係因為壽司飯比較硬身, 但味道係OK嘅。手捲比起壽司做得要好, 至起碼嚟到枱嘅時候啲紫菜仲係脆脆地, 食放題真係冇期望過手捲嘅紫菜會係脆身。炸物我就唔太欣賞, 事關我唔係太喜歡食煎煎炸炸嘅嘢, 但味道都算OK。烤羊架, 我就覺得味道係一般之下, 因為個烤羊架唔係烤嘅, 而係炸嘅, 我唔鍾意食炸野。overall嚟講, 啲嘢食算OK, 而且食物都算乾乾淨淨尤其係魚生壽司之類, 都算值得畀個笑面。