正宗水上人氣鍋專門店 (已結業)

七個人去食，一拎起餐牌，嘩！成4388！真係當堂嚇一跳！仲要因為我地有7個人，仲要收多350俾多一個人錢。不過見餐牌都相當豐富，所以照落單。一開始拎左兩小碟花生同一條魚刺身俾我地。跟住上海鮮拼盤，見到一盤海鮮入面得一隻蟹(普通size, 唔係皇帝蟹)。心想唔係掛，七個人食海鮮鍋一隻蟹點分呀，有無攪錯？跟住有個阿姐開始幫我地蒸海鮮，原來呢間野海鮮數量非常有限，成晚阿姐配給俾我地:蜆5粒，中蝦兩條，珍珠蚌2隻，帶子一隻。嘩我去酒樓上菜都一盤蝦拎上黎啦，而家個蒸籠入面得14條中蝦，一人兩條仲要食完即止，真係好珍貴囉。珍珠蚌係街市買到40斤個d。帶子街市賣5蚊一隻。蜆5粒！你玩我呀？周打蚌湯都多蜆肉過你啦大佬。跟住上左一條斑魚，一隻蟹，係成枱人分既。我地小心翼翼客客氣氣咁分左隻蟹，有人到最尾得返個蟹殼。條魚仲細條過平時飲宴既個d, 分屍之後，我分到3啖魚肉。除左海鮮之外，我地每人仲分到一口豚肉，一碗魚粥，兩條菜心同埋一磚桂花糕。食完晒我都仲係肚餓呀大佬。