Golem Craft Beer (已結業)

石門好像是一個工商區，一個話大唔大，話細唔細既地方，但食肆林立，選擇其實都唔小。但本人對漢堡素有偏好，但身在石門既我，都恍惚未食過好好味既漢堡，但機會終於來臨啦。朋友約我去左好近石門地鐵站既餐廳食lunch，一講個名即刻驚一驚。舖頭名叫GOLEM，我心諗點解個舖頭名咁得意既，唔通係魔界三部曲d 粉絲開既。 去到原來舖頭都幾Grand，有小小五星級酒店既格局，跟住睇餐牌，竟然有我最喜愛既漢堡。唔駛諗，即刻叫! 但反而餐飲就真係要諗諗，因為都幾多款式，最後叫左個熱朱古力。餐前小食係湯或沙律，我就要左沙律，其實味道都幾清新，食落個感覺好好。 主菜係黑松露和牛漢堡，我覺得佢個漢堡真係貨真價實，無論係黑松露，芝士，牛油，配菜都絕不手軟，絕不馬虎。所以比你既感覺係好滿足，但你又食唔落多一個既感覺。跟住杯朱古力實在有驚喜，朱古力都有拉花同埋杯朱古力真係好好味，絕對滿足到好朱古力既朋友。雖然天氣有d凍，但食飽漢堡，飲飽朱古力之下，冬天雖凍但絕對暖在心頭。