首首.韓式小館 (已結業)

放咗工就梗係請媽咪食餐好嘅，利東街雖然都可以話係遊客區，當然亦不乏香港人啊！因為都有好多特色嘅多國餐廳，當中今次就選擇咗韓國菜。大概七點幾，大部份都係外國人，亦都有香港人，大概各佔一半左右。小食=]韓式燒牛肉拌飯＄128裏面除咗有牛肉之外，都有切得好細條嘅菇，紫菜，蘿蔔，豆芽。旁邊會包埋一個湯同埋辣醬，湯就鹹鹹地，有少少似日本味增湯。辣醬其實都幾辣，建議唔好加太多，少少哋試咗先，如果唔係嘅話太辣就返唔到轉頭。紫菜都係鹹香十足，紅蘿蔔都辣辣地，成件事非常豐富，熱辣辣好好味。香煎韓式薯仔脆餅（3件） ＄108出嚟食薯餅，百幾蚊係唔係好蠢？其實一啲都唔蠢，因為佢唔係麥記嗰種質素，將薯仔切細條，煎得剛剛好，令到外面食落好鬆脆，但係裏面仲有薯仔嘅水份，稔稔地。仲有個鹹鹹地嘅專用醬汁，旁邊嘅菜都好清新可以一同品嚐。長泡菜燉殻飼豬肋骨＄128店員比左兩隻碗仔我哋，我都唔係好明白，原來就係可以飲泡菜湯。泡菜湯辣辣地，香氣十足， 十分惹味。豬肋骨就唔係西式調味個種，反而係好似普通煲湯，就入咗啲泡菜味。本身食咗少少下午茶，幾個餸已經飽晒，都幾有特色值得推介。