福岡漢堡扒 (厚福街) (已結業)

相信有好多人都鍾意食韓國菜，但係你又知唔知原來韓國菜之中有一樣叫福岡漢堡扒？雖然我好鍾意食韓國菜，但係我都係上網先知有呢款菜式！呢間韓國開過來嘅店舖，用上澳洲和牛整成漢堡扒，仲有得自己燒。餐牌主打食和牛漢堡扒，有數款味道可選，仲有S, M, L 三個size選擇。環境好鍾意枱面嘅迷你吸煙喉！每人一個好特別，又可以令餐廳無咁大油煙。芝士蛋蒜和牛漢堡扒 $124(M) 由澳洲和牛漢堡扒、芝士、蒜組成，一上枱已經勁吸引，仲有蛋襯托住和牛漢堡扒，附上經高溫熱燒過嘅石頭，自己切份量上石頭上燒，記得要用鏟壓實同埋唔好切太好太多份量，否則入面好易唔熟但外面就燶哂！漢堡扒肉味濃郁，配埋芝士蛋一齊食嘅話味道層次更豐富，如果蒜頭再多啲就更香口！菠蘿煙肉和牛漢堡扒 $139(L) 呢款嘅分別在於有菠蘿同埋煙肉，少咗芝士，但係漢堡扒係一樣，我就鍾意芝士蛋蒜和牛漢堡扒多啲，但鹹香嘅煙肉及和牛漢堡扒配上甜酸菠蘿都幾Match。