學利魚蛋 (已結業)

剛收工返到大埔，本想做完運動先食晚飯，免得操到嘔，但時間倘早，仲有好多時間，個肚又已經不停地叫，咁只好快快去醫左肚先啦 ~ 雖然學利都好業左十幾廿年，可能更耐，但我都係今年先第一次黎試，到目前應該都幫襯左約六七次，每次坐底都想叫啲新野食吓，不過最後都係食返牛腩撈粗，我實在太尊一喇 ~ 所以到依家都唔知其他出品既質量同味道係點呢 ....五香牛腩撈粗麵走蔥，侍應妹妹一放低碟麵，見到賣相勁靚，嘩 ﹗好整齊，勁開心呀 ﹗所以包裝真係好重要架 ﹗望落去啲粗麵乾身又有光澤，平均地墊係底，無多餘水份留低。五香牛腩好整齊咁鋪係面頭正中間，濃郁五香牛腩汁亦不偏不移淋係正中間，擺位非常靚，恰到好處。咁多間五香牛腩，到現時唯止我唯一欣賞既只有學利，炆得非常非常入味，選料上等，雖然係瘦肉，但啖啖肉得黎又不失軟棉棉口感，而且又有趙口不鬆散。濃郁既五香腩汁加上勁辣辣椒油配上靚牛腩同靚粗麵，今次完完全全係滿分，無得彈。清湯鮮甜可口，忍唔住要飲到見底先可以停，實在太好味，好滿足 ﹗蠔油生菜走油，好鮮嫰爽口，輕輕大火烚一烚、拖一拖，已超香甜美味，又充滿水份。