瑞士咖啡室 (裝修中)

呢間位於葵興貴盛工業大廈嘅瑞士咖啡室 已經喺葵興好多年 入面寫住只招待大廈員工 但其實佢都只係一間普通茶餐廳 任何人都可以入去 一推開門 就會發覺入面嘅地方非常之大 而且佈置都幾特別 幾有懷舊嘅特色 座位就好似一般茶餐廳咁 係有少少迫但係還可以啦 我幾喜歡佢嘅早餐 早餐嘅種類有好多 你想得出嘅都有 無論係正常嘅港式早餐 三文治 還有啲特色嘅多士 我最鍾意食佢嘅 吞拿魚撒蛋多士 再配杯 熱奶茶 真係一絕 另外佢嘅午餐亦都有好多唔同嘅選擇 例如會有粉麵啦 會有一般嘅 炒粉麵飯啦 又會有一啲特色嘅咖哩 其中有一個叫牛魔王咖哩飯 辣辣地 幾特別幾好味㗎 佢嘅價錢唔貴 我自己覺得佢畀茶餐廳略為平一啲添 但係食嘅種類就有好多 味道亦都唔錯 喺葵興返工 食呢一間 係一個唔錯嘅選擇