日日香鵝肉飯店 (已結業)

行完元朗間十二蚊店便到附近搵野食，見有人排隊買燒味便過去望一望，原來開有日日香，見佢周圍都有分店但從來未試過，就今日去試下佢先。店內都幾濶落，好光猛兼冷氣十足，坐得幾舒服。下午茶時段黎到，叫午餐有九折喎，叫左一個雙併米粉再加個湯，加埋79蚊唔使加一。個餐有飲品送，要左熱檸水。加9蚊有個鵝骨湯，呢排少湯水想飲下。入面都好足料喎，除左鵝，仲有茶樹菇、杞子等，飲落鮮甜唔油膩，幾好味。H餐嘅滷水雙併飯，轉左做米粉。個套餐可以轉米粉、瀨粉、河粉，不用加錢㗎。雙併揀左鵝肉同豬大腸，另外伴碟仲有豆卜，豬肉條，滷蛋同甜酸菜。大腸滷得入味，少少肥膏夠滋味。鵝肉鮮味，咬落有口感。米粉超大碗，放到滿滿的。湯底無乜特別，淡淡地仲好可以加滷水汁落去。米粉真係超多，偏淋少少，可能吸湯耐左掛，整體都ok無爛先啦。啲鵝真係幾好味，不愧係食鵝嘅專門店。