SuSoShu (已結業)

用餐時間：普通星期4 1200今日朋友生日，就專登帶佢試下呢間高級日本餐廳。叫左2個壽司套餐(包11件壽司，1件手卷，沙律，面鼓湯，甜品)+兩杯梳打。呢個沙律做得好好，食材新鮮，沙律醋整得酸酸地好開胃。比較特別既係入面有我平時少食既無花果。呢個梳打幾好，唔係用糖漿整出黎，所以甜度適中，好飲過平時飲開既荔枝梳打。11件壽司無一件係伏，件件都唔錯。大吞，啫喱蟹肉，甜蝦呢3件我覺得最好食。吞拿魚蓉卷係我覺得比較失色既一件，取材比較普通，同其他壽司比確實比唔上。手卷係三文魚籽+松葉蟹蟹肉+天婦羅碎。紫菜用火烘過好脆，入面三文魚籽超級多，由頭到尾都包滿曬，超級滿足。其餘兩款食材就無三文魚籽咁搶味。面鼓湯幾好，唔會好鹹，入面啲蜆仲要幾大粒添。今日既甜品係荔枝啫喱。外觀整得好靚，有一粒原粒荔枝係啫喱入面。食落都幾好，啫喱好食，荔枝都新鮮！最後埋單$980，兩個人平均$490。呢一餐價錢黎講算係偏貴，不過食物質素好高，無一樣野整得唔好食。而且店員服務態度好好，會主動同我地介紹翻啲食物，又肯幫我地打卡，所以我覺得以呢餐生日飯既用餐體驗黎講，呢個價錢性價比都係唔錯既。