FeivouriteFood 等级4 2022-03-05

380 浏览

唔知大家喺香港钟唔钟意食Omakase？我成日觉得要食到好食嘅Omakase，一定要喺日本，因为香港点好食都唔够日本食材新鲜，但经过今次之后，我觉得Omakase除咗系美食嘅盛宴，仲系对每一道菜更加认识、令你更加爱上嘅过程。Susoshu系一间尖沙咀新派日本菜餐厅，餐厅名全名系「寿司を食って、荞麦で〆る。日本酒もある、长い名前のレストラン。」，其实系三个字既缩写，分别系Sushi 、Soba、Shu，意思系食完寿司之后以荞麦面作结，仲有日本酒提供，所以餐厅系主打寿司、荞麦面同日本酒，令客人可以享受到日本居酒屋嘅地道美食。餐厅有唔小食材由日本直送，好似和牛用上日本直送熊本A4和牛，菜式方面加入左创意元素，加上日本正宗嘅烹调细致，加上够多元化，好似有特色席前烟熏和牛、海天一色嘅寒天甜品。品尝美食嘅同时，自己好似置身系日本咁，不知不觉渡过三个钟时光。餐厅装修以木系为主，座位唔算多，大概可以容纳到20个人，除咗座位，最吸睛一定系摆满左唔同日本酒嘅酒柜。如果系食omakase，建议一定要book吧枱位，因为咁样先可以同厨师交流，可以近距离睇住师傅制作。师傅好细心讲解每道菜嘅特色同埋来源。-🍣 献立 💰1480（👅: 9/10）呢个系餐厅嘅晚市Omakase套餐，以海鲜为主题，每三个月就会转一次Menu，而呢一个set咁啱就系11月中开始，所以可以见到当造嘅白子，而且仲有餐厅最受欢迎嘅菜式，好似究极海胆、特制和王A4和牛寿喜烧、青森县大间中拖罗、招牌荞麦面等一共十一款。-1️⃣ 海老他他脆筒（👅: 8/10）第一样系一个用紫菜做成既脆筒，麻雀虽小但系入边有海老他他、自家制芝士、山葵渍、腌萝卜、寿司饭，最上面有一个炸虾头，睇落系一个迷你手卷，上面有个试管豉油比客人自己控制落既份量。紫菜有用火枪烧过，所以咬落去非常脆身，连同非常酥脆嘅炸虾头内馅食落无论味道定系口感上都非常丰富，芝士嘅味道特别突出，系几特别嘅配搭，作为前菜几开胃。-2️⃣ 白子天妇罗（👅: 8.5/10）11月绝对系白子嘅季节，香港人可能未必知，白子其实系鱼既睾丸，系日本系好常见嘅前菜小食，而且食落去有好丰富嘅蛋白质，仲可以美颜。平时食白子都系酸汁白子子刺身多，呢度除咗刺身仲可以拣天妇罗，所以就拣咗未试过嘅后者。呢度白子都系最常见嘅鳕鱼白子，白子嘅外层炸衣够轻薄，咬落去入边非常creamy，入口够滑，好似食紧豆腐，够肥美，食落完全冇腥味，因为冇刺身嘅酸汁所以冇咁开胃，但比起平时食嘅刺身更加香口，上面仲有啲葱花同萝卜蓉中和一下油腻感，对于未能接受白子本身嘅口感可能会更易接受。-3️⃣ 呼子鱿鱼烧卖（👅: 8.5/10）佐贺县有一个地方叫做呼子，𠮶度最出名就系出产鱿鱼，呢度就系用咗呼子鱿鱼，切成一条条，包住依个烧卖，入边系用上日本黑毛猪肉既内馅，系用日本嘅材料整成嘅烧卖，上枱时连埋个小蒸笼一齐上。鱿鱼咬落非常软滑，够弹牙，带小小胶质，食落鲜甜，而黑毛豚肉比起鱿鱼更弹牙，食落猪味浓郁，比起平时嘅港式烧卖更有惊喜。-🍣 时令寿司四贯寿司饭用上日本越光米，入口系有弹性带软黏，软硬适中，食落有米香，再加左小小赤醋，突出鱼肉既甘甜，唔会太有醋酸味。-🍣 爱媛县蜜柑狮鱼（👅: 8.5/10）狮鱼即系未成长既油甘鱼，咬落去鱼够爽身，小小似食紧池鱼，因为加左蜜柑所以多左小小甜味。-🍣 北海道秋刀鱼（👅: 8.5/10）秋刀鱼系秋冬季既鱼，咬落够晒肥美，食落鱼味比较浓郁。-🍣 青森县大间中拖罗（👅: 9/10）呢度嘅中拖罗做法同平时有啲唔同，用左铁板烧既概念，首先会用火枪烧一烧铁板，再用烧热左既铁板焫过拖罗嘅表面，令到佢多左一层焦香。拖罗系熟成左两星期既吞拿鱼，非常厚身，够肥美，入口细嫩无筋，食落去除咗食到拖罗嘅脂肪，仲食到炙烧过嘅焦香，令到鱼味更加突出。-🍣 火炙右口鱼边（👅: 9/10）咁多件寿司最钟意呢一件，可能因为佢系最重味，由淡到浓味最后一件嘅寿司。一般右口鱼边比左口鱼更多油份，所以呢度用右口鱼裙边，师傅会用火枪直接火炙右口鱼边，将佢嘅油香迫出黎。摆入口系真正嘅入口即溶，带有焦香，平时大家食左口鱼可能有渣，但呢个系完全冇，喺口腔入边系油香四溢，齿颊留香，加上去既蒜味酱油令到佢味道层次增加提升。-4️⃣⃣ 𩽾𩾌鱼肝（👅: 8/10）𩽾𩾌鱼肝一直都好想食，不过平时系居酒居太多嘢想食，一直都眼阔肚窄试唔到。呢度师傅首先会用牛奶浸过鱼肝再蒸，所以入口𠮶时非常幼滑，够creamy，即使系我唔太钟意食内脏嘅人，呢个鱼肝内脏味都唔算好重，而且冇腥味，配搭酸汁啫喱同辣萝卜蓉，可以盖过内脏嘅味道，味道更加有层次，令佢变成一道我好开胃嘅小食。-5️⃣ 究极海胆（👅: 9/10）终于嚟到今晚嘅主角，相信大家黎呢一间餐厅，唔多唔少都系为咗佢，系份量唔孤寒既招牌究极海胆。海胆用上北海道浜中小川赤海胆，师傅首先会用火枪烧一烧紫菜，摆上少少醋饭之后，将一整排嘅海胆覆盖喺醋饭上面。海胆份量澎湃，色泽均匀。本身我对海胆唔系有好大好感，因为喺香港平时食到嘅，好多一系鲜味海胆味唔重，一系有腥味，但呢个海胆真系入口即溶，口感幼滑，够creamy够湿润，每一旧都好肥美够晒饱满，绵密不断，留喺口腔嘅系海胆嘅鲜甜味，少少苦涩味都冇，浓郁可口，令人回味再三，另外即刻食仲食到紫菜嘅香脆，绝对系外脆内软，系我香港食过最好食嘅海胆，食完会令我对海胆改观，而且想揾香港好食嘅海胆。-6️⃣ 松叶蟹甲罗烧（👅: 9/10）秋冬季要食嘅一定系甲罗烧，入边有松叶蟹肉、蟹膏、鹌鹑蛋、味噌、葱，啲面会系你面前用一个小火炉烧，帮你搅匀，喺隔离闻到香味不断涌出。蟹肉够长，咬落去口感札实，食落新鲜，蟹膏香味有不过唔会重到盖过其他味道，成个蟹味浓郁，食完好耐仲停留喺口腔，比例配搭得好好，味道层次丰富，系我食过最好食嘅甲罗烧。-7️⃣ 时令醋物（👅: 8/10）食完咁重味嘅甲罗烧，餐厅俾咗一个时令醋物去清一清口腔，系一个用玻璃试管装住既柚子醋啫喱，质地偏水状，食落去酸酸甜甜，够开胃，清新完味蕾，准备迎接下一个重口味菜式。-8️⃣ 特制和王和牛寿喜烧（👅: 9/10）之后上枱嘅系一个餐厅其中一个招牌，系特制和王和牛寿喜烧，和王系用上熊本县A4级嘅顶级和牛。牛肉入口非常软嫩，食起嚟牛味重，油香丰富，但唔会太腻，加上自家制嘅寿喜烧汁，更加滑身，加左特级松茸落去煮，蛋浆食落鲜甜带焦香。惊喜嘅系呢个寿喜烧落咗少少山椒粉做调味，所以边食边感受到舌尖上的麻痹感，唔会净系食到鸡蛋嘅香甜，但又唔会有过火嘅麻辣感觉，非常过瘾。下面仲有啲葛粉条，吸满咗酱汁，连汁一滴不留咁清哂。-9️⃣ 樱花虾粉荞麦面（👅: 9/10）喺香港要食到好食嘅荞麦面系非常之难，因为冇咩专食荞麦面嘅专门店或者餐厅，不过呢度荞麦面就系餐厅嘅招牌，餐厅喺午市、晚市都有供应荞麦面，不过呢个套餐嘅荞麦面系特别版，因为上面加咗樱花虾粉，师傅将晒干左嘅樱花虾磨成粉。日本鹿儿岛直送既十割荞麦面，意思即系100%用荞麦粉制作，冇用任何面粉，咬落去偏硬身，带烟韧弹牙，食落去荞麦味重。而荞麦面嘅汤汁系用虾仔干、鱼仔干、蟹仔干、海带、昆布熬成，食落去系咸甜交集，鲜味十足，加咗樱花粉入去，食落去系非常鲜甜，令到成个荞麦面都香口左，而且多咗少少脆口嘅口感，汤汁同面条非常夹，好快就鲸吞虎咽食晒，呢个算系我喺香港食过最好食嘅荞麦面。-🔟 夜空寒天（👅: 8.5/10）呢个甜品绝对系依度嘅招牌，当初我留意到呢间餐厅嘅原因都系因为佢，外观上成个艺术品咁，渐变色除咗好似海洋之外，睇落仲好似富士山。上面白色嘅系用咗喺Donki成日见到嘅「澪」气泡清酒制成，下面嘅系用咗碟豆花加柠檬汁制成嘅寒天冻，要整成下边好似海洋嘅蓝色系非常困难，需要好多次嘅调教，因为喺黄光、白光嘅情况下颜色都会唔同，细心到连餐厅嘅灯光都考虑左，加上成个甜品都系用天然而唔系人造色素，呢个甜品值得佢咁出名。因为前边食咗好多好似甲罗烧、寿喜烧呢啲咁重味嘅嘢食，需要一啲清新嘅甜品解一解腻，呢个甜品系可以做到呢个效果，咬落去系大菜糕同啫喱之间嘅口感，够Q弹爽口，食落去系带轻微嘅清酒味道，如果冇饮酒嘅人就会食到，饮咗酒就可能食唔到佢嘅酒味，下面就会食到柠檬汁嘅少少酸味，够清新，系一个完美嘅完结。-🍶 真澄💰70（👅: 8.5/10）呢支系宫坂酿造真澄漆黑KURO 纯米吟酿，入口淡华，饮落去系偏水果味，味道饱满，同日本菜、海鲜非常搭配。-🍹果味梳打💰38（👅: 7.5/10）饮落去系桃味，正常唔算太甜。-🌟 整体食物质素绝对系高质，当中最欣赏嘅系佢哋嘅荞麦面、寿喜烧、寒天、海胆、甲罗烧、火炙右口鱼边、大拖罗。因为香港无咩专做荞麦面既餐厅，食完我觉得以香港质素来讲嘅高质，下次会想系lunch Menu再试多次。可惜当中得海胆可以单点，其他只可以系OMAKASE MENU食到，如果餐厅可以单点绝对会再试上面既菜式。-👅味道: 9/10🍴环境: 7.5/10💰消费: $1480pp (服务费: 10%) 继续阅读