長發麵家 (已搬遷) 新店位置

去深水埗做嘢，可以嘅都會去呢度食雲呑麵，以前要坐街邊，地方比較污糟，亦無冷氣，自從旁邊加咗間鋪，有冷氣，可以食得仲舒服，去到唔使等位，舖內雖然零裝修，普通摺枱膠櫈，幸好地方尚算光猛乾凈，餐具亦唔會黏，樓面有一個阿姐，廚房有個師傅淥麵，一個阿嬸執枱，我叫咗：淨雲吞：雲吞細細，皮好薄，主要係豬肉，都鲜味，只有一兩隻細蝦，蝦新鮮唔會梅，咬開內有好多蝦籽，所以味道好濃，清湯有好香大地魚味，連蔥花一齊飲，好香濃！豉油撈粗麵：跟一碗清湯，最正係撈麵嘅豉油，應該有加豬油，好香好濃，甜甜地，粗麵彈牙，最重要無鹼水味，撈埋一齊食！我成碗清晒！水餃一隻（同事的）：好大隻，皮薄（所以一用湯匙撈起就裂開）內有大量木耳絲，爽口好食！本來成餐午餐好滿足，點知衰收尾，因為樓面阿姐無寫單，食完只係數碗，我哋再出去大排檔收銀櫃枱俾錢，點知阿姐數錯數，多了一碗，到我們更正佢時，阿嬸已經收緊枱，死無對證，雖然麵家最後收我們講嘅數量，但樓面阿姐不斷大聲問收碗阿嬸，到底我哋張枱有幾多個碗，好似我哋呃數咁！不過阿姐又唔係態度差，落單亦有禮！只係做得太...唔顧人情世故！