餐廳裝修俾人感覺好溫暖，唔會好熱鬧好嘈，啱晒二人世界。
我同女朋友都好鍾意食薯條，見到Menu有松露薯條，諗都唔諗就嗌咗喇。女朋友揀咗個龍蝦汁椰菜花燴意大利飯配龍蝦尾，我就嗌咗蘋果木燒西班牙黑毛豬鞍扒。因為怕有啲膩，所以加咗個黑醋吞拿魚沙律。
店長好有心，叫廚房安排食完一道菜再上另一道，以免食物變凍。
先嚟嘅係松露薯條，除咗松露醬，薯條上仲灑有黑松露粉，Double松露！薯條一咬，外脆內軟仲出晒煙，松露醬都好快俾我哋點曬⋯
之後上咗吞拿魚沙律，每一塊吞拿魚都有啲黑芝麻包住，應該係慢煮處理過，有半生熟嘅感覺。配上酸酸甜甜既黑醋同埋沙律菜，好開胃呀！
終於到咗主菜喇，大大條龍蝦尾放咗喺龍蝦汁意大利飯上面。個龍蝦汁非常濃郁，吸晒落啲飯度，淡淡都係龍蝦嘅精華！龍蝦汁飯入面混合咗切碎咗既椰菜花，令意大利飯有不一樣嘅口感，有驚喜！
西班牙黑毛豬鞍亦都非常出色，差唔多一寸咁厚，啖啖肉！用蘋果木燒完之後特別香，去除咗豬肉帶黎既油膩感。配菜芝士薯仔亦一啲都唔弱，好快就俾女朋友食晒！
最後我哋決定追加一個甜品，Apple crumble. 佢製作嘅方式比較特別，唔同一般成個撻咁焗。杯入面最底嘅係蘋果蓉同蘋果粒，面頭就係一粒粒脆卜卜嘅crumbles。D crumbles 好有驚喜，有d似shortbread粒，又有好香既玉桂味，再配上冰凍嘅雲呢拿雪糕，呢餐完滿了！
