天山小館 (已結業)

天山小館原來係屋企附近都開左一段時間，但由於好少行水星街果邊，所以留意唔到。一入到去就見到D裝修好有新彊特色之餘又FUSION香港人餐廳既特色─有卡位！老闆娘熱情為我地推介特色小菜，原來老闆娘係新彊女子，唔怪得咁靚啦。我地係老闆娘既介紹下，叫左個手工涼皮，涼皮好滑，配埋酸酸辣辣既汁好夾、好開胃。雖然我唔太好羊，但朋友鐘意食，於是就叫左烤羊肉串同羊肉餡餅。老闆娘講得岩，D羊一D都唔羶，好好味，連我都忍唔住食左好多。之後就叫左招牌菜陳醋咕嚕肉，果然名不虛傳，外脆內軟，好有肉汁，加上粉漿唔厚身，個汁酸酸甜甜，開胃之餘又解膩。但肉食性既我地最後忍唔住叫左個士多啤利骨，排骨炸到好酥脆，士多啤利味好香，令人一食再食。由於食得好飽又食左好多熱氣野，所以叫左杯紫貝天葵，係我飲過最好飲既紫貝天葵，甜度岩岩好。