利強記北角雞蛋仔

营业中

休息中

師傅都有一段好長時間冇寫食評喇, 但絕對唔係封筆, 只因呢期師傅真係太忙, 未能兼顧, 要各位食客同粉絲久等, 實在不好意思; 所以師傅亦不敢怠慢, 拿拿聲寫番食幾個評先! 話說師傅經常喺呢區出沒, 而每次行過呢度例必見到一條小龍, 望真啲先知係賣雞蛋仔! 由於雞蛋仔並唔係咩特別食物, 加上師傅又係特別鍾意食, 而且仲要排隊添, 所以師傅從來都冇試過; 碰啱早兩日經過, 見冇人排隊加上個口有少少痕, 就決定買一底雞蛋仔, 止下個口先!行到埋去, 柯打左一底, 比完錢後就企埋一邊等, 唔使三分鐘, 熱辣辣嘅雞蛋仔就已經送到師傅手上! 師傅當然唔客氣, 第一時間就撕左一粒落黎食, 當放左入口師傅第一個反應係O咀, 因為估唔到咁得, 得到好似發現左新大陸咁, 簡直係驚為天人; 雞蛋仔不但熱辣辣, 而且仲脆卜卜, 陣陣蛋香, 而師傅最欣賞就係雞蛋仔做到空心嘅感覺, 唔韌唔黏牙, 加上蛋漿唔會太甜, 所以非常好味! 師傅用左唔夠五分鐘就一個人隊晒成底雞蛋仔, 由此可見雞蛋仔嘅威力! 總括而言雞蛋仔水準堪稱一絕, 價錢唔係太貴, 十三蚊一底, 熱辣辣, 絕對有誠意; 師傅覺得鍾意食雞蛋仔就必定要試