尚上下夏 - 養生雞煲火鍋 (已結業)

呢間火鍋店真係好有以前香港大排檔嘅風味啊！坐入去發現佢哋用緊嘅係Gas爐而唔係電磁爐，而且張枱都係喺大排檔嗰種風格！坐低佢哋俾咗一碗水，我仲諗碗水攞嚟做咩嘅於是我問店員，店員同我講攞嚟洗碗嘅，果然真係程序都要跟足大排檔呀！聽講呢度雞煲都幾出名㗎，見到Menu仲可以揀部位真係啱晒我呢啲唔識得食骨嘅人啊！我哋揀咗半份雞胸肉雞煲，估唔到半份上到嚟個份量真係好多啊，最爽係件件都係啖啖肉，而且肉質都幾彈牙！雞煲入邊總會有啲豬皮㗎，如果唔識可以同店員講。其實食完個雞煲都開始有啲飽肚㗎啦，始終真係真材實料！下次再嚟真係想食佢個雞煲再配個白飯，諗起都覺得正，哈哈哈！食完個雞煲可以加湯就打邊爐㗎啦，我哋都叫咗幾款配料！手打四寶丸十分推薦，食得出啲丸真係人手打出嚟嘅，特別彈牙而且肉質十分結實，仲有有四種口味（墨魚丸、雞丸、蝦丸、豬肉丸）。牛肉係打邊爐必點，手切頂級安格斯牛十分嫩口，入口即溶，輕輕一滾就食得，正阿！而且半份嘅份量好夠兩個人食！我哋仲叫咗個鬼馬墨魚，就係墨魚滑釀油炸鬼，呢個口感都幾特別！墨魚滑彈牙，油炸鬼脆口，當放落啲湯嗰度滾一滾會吸晒湯底嘅精華喺油炸鬼度！總括來講，我一定會因為個雞煲而二訪㗎