喀什米爾咖哩屋

营业中

休息中

工作又嚟到深水埗，又係搵食嘅時候，記憶中有間食印度嘢嘅地方，但忘了名字及地址，search唔到，唯有靠記憶搵位置，哈，又俾我一搵就搵到。原來叫喀什米爾，下次記住先。趁住牛脷嫂唔喺身邊，立即搵個羊肉口味食下，嚟個印度羊肉炒飯，最鍾意食印度米，一粒粒，好乾身，夠硬，見仁見智的口味，我就係喜歡呢種米，啲羊肉就比較普，反而我覺得個炒飯先係主角，羊肉變左係配角，雖然都有7、8件，但口味未見突出，唔夠羶。見到唔係幾夠喉，打開menu，有個牛肉卷餅，好似唔錯喎，但成四件，雖然廿蚊，唔算好貴嘅小食，不過始終驚食唔哂，膽粗粗問下老闆，哈，佢竟然肯俾我叫2件，收$10，仲抵。雙贏，佢又可以賺多$10，我又唔使食唔哂。講返個牛肉卷餅先，個外表就真係不敢恭維，但食落又幾好食喎，有辣味，又有牛肉味，仲幾好咬口，食飯食埋二件卷餅，啱啱好。滿足。食飽飯，開工去也。