Pause It

营业中

休息中

搬舖後嘅 Pause it 仍在試業中，新店闊落光猛，窗明几淨，喺旺角市中心嘅地舖嚟講，算係少見。試咗個牛油果慢煮雞胸意大利飯，我覺得份量屬正常，不過由於隻碟比較細隻（同其他 cafe 比較），所以畀人感覺好似細碟咗啲😂。要讚嘅係 risotto 嘅口感，唔會過腍，雞胸肉亦唔嚡口（呢兩樣係好多餐廳嘅弱點）；至於要改善嘅，我覺得係牛油果嘅 presentation，通常會揀食牛油果嘅人，係鍾意佢嗰種獨有嘅鮮味，而家將牛油果變做醬汁，鮮味係消失咗，食 risotto 時只係覺得 creamy 同芝味濃。如果保留一啲牛油果粒，應該會好食好多。再 order 杯 Latte，店員問我想要 nutty 或 fruity 風味，我當然揀前者。咖啡上枱，個拉花係靚嘅，呷一口，咖啡味幾香濃，唔錯，不過個 body 感覺頗為稀薄，唔夠厚實。