泰斗 (中達大廈)

营业中

休息中

天氣實在太熱啦冇乜胃口，食泰菜酸酸辣辣就最醒神。本身都係尖沙咀飲緊野就睇吓附近有邊一間好食，搵到呢一間評價都唔錯就試吓。同朋友八點半上到去，人山人海，咁多人食味道應該有保證！等左大約10分鐘左右就有位，地方雖然唔算好大但座位闊落舒適，深木式裝修充滿泰國風情。先來小食拼盤，雞翼已經剪咗半再炸，單骨食好方便。蝦餅同魚餅好出色，蝦餅彈牙又夠脆好香口，魚餅材料豐富，豆角香茅檸檬葉紅蔥頭令到口感充滿層次，咖喱味又香。春卷則不過不失。冬陰公湯一上枱就已經分好，服務唔錯唔使自己分，飲完再上另外兩碗。味道好正宗，但可能因為遷就香港人減左辣，下次叫佢加辣先。酸辣青檸明爐魚一上場就好吸睛，條魚仲長過手臂，而且會加酸酸甜甜嘅湯落去。湯嘅味道就好似加熱左嘅泰式海鮮沙律汁，超級開胃，亦都令到條魚鮮而不腥。粉絲份量好多，吸左湯汁精華，加埋紅洋蔥味道一流。紅咖喱牛腩，牛腩炆得淋又入味，份量又唔少，即刻叫返個飯撈汁食，正。總括嚟講味道正宗，雖然價錢唔算好平但份量大，呢間餐廳性價比都幾高。