影片
更多
2020-07-10
501 浏览
呢間野呢…/ 背景及當日情況 / 平日經過周不時都見到好多人，有一次試過攞飛排隊要等成兩個幾鐘，梗係冇食啦，今次見到冇人排隊，其實都係平日7:00左右嘅時間，唔知係唔係佢嘅臭名已經開始遠播嘅關係，基本上可以直入唔使等位。食過海底撈，知道佢有指定嘅侍應負責邊幾台枱，每次入座都會介紹負責你張枱嘅侍應名俾你聽，呢度冇呢一個安排，所以基本上每次你要叫野，加湯，加菜，埋單，都只能夠長時間無助地舉起小手，希望經過嘅侍應會望你一眼。咁當然總會有人見到，然後由於佢手頭上有其他嘢做緊，又或者佢並唔係安排負責你張枱，就會同你講等等我搵同事幫你，當然你就唯有等落去啦。/ 服務 / 見呢度好多review寫佢哋呢間的服務唔好，我覺得其實一般侍應態度都正常，冇話唔禮貌，但係殷勤就真係稱不上啦，唔好話佢會唔會主動留意你需唔需要加湯或有咩需要，甚至連你舉手叫人都需要等一段時間。/ 漏單問題 / 我哋落單時叫咗冬瓜，冇黎到，舉手搵侍應跟單，當然跟到埋單都冇人過嚟update過我哋，我哋睇單嘅時候發現，佢根本冇落到，但我哋肯定係有叫到的，啊係，佢落單無紙冇iPad，你只係口噏噏同個侍應講，但打邊爐要叫咁多嘢，成枱人想食
/ 背景及當日情況 /
平日經過周不時都見到好多人，有一次試過攞飛排隊要等成兩個幾鐘，梗係冇食啦，今次見到冇人排隊，其實都係平日7:00左右嘅時間，唔知係唔係佢嘅臭名已經開始遠播嘅關係，基本上可以直入唔使等位。
食過海底撈，知道佢有指定嘅侍應負責邊幾台枱，每次入座都會介紹負責你張枱嘅侍應名俾你聽，呢度冇呢一個安排，所以基本上每次你要叫野，加湯，加菜，埋單，都只能夠長時間無助地舉起小手，希望經過嘅侍應會望你一眼。咁當然總會有人見到，然後由於佢手頭上有其他嘢做緊，又或者佢並唔係安排負責你張枱，就會同你講等等我搵同事幫你，當然你就唯有等落去啦。
/ 服務 /
見呢度好多review寫佢哋呢間的服務唔好，我覺得其實一般侍應態度都正常，冇話唔禮貌，但係殷勤就真係稱不上啦，唔好話佢會唔會主動留意你需唔需要加湯或有咩需要，甚至連你舉手叫人都需要等一段時間。
/ 漏單問題 /
我哋落單時叫咗冬瓜，冇黎到，舉手搵侍應跟單，當然跟到埋單都冇人過嚟update過我哋，我哋睇單嘅時候發現，佢根本冇落到，但我哋肯定係有叫到的，啊係，佢落單無紙冇iPad，你只係口噏噏同個侍應講，但打邊爐要叫咁多嘢，成枱人想食嘅嘢又唔一樣，咁樣落單法真係奇怪，旺角cheap cheap地方都識得搵張紙比你 tick 啦，都唔一定話要咁高成本用iPad，咁起碼成枱人都見到其他人已經點左乜嘢，張紙一路傳落去睇吓有冇嘢要加，大佬咁做嘢先合理架嘛。
/ 食物質素 /
— 湯底，麻辣一啲都唔好食，咁呢樣野好個人，有興趣就自己叫黎試下，令一邊叫咗花膠雞，入邊有大量豬皮，個湯好杰，感覺係碗仔翅個種呢，唔好以為真係因為落咗好多花膠，不過都應該唔會咁以為，因為真係好有分別。入邊仲搵到一隻大概手指公指甲咁大嘅鮑魚仔（？）
— 牛肉，點左最平嗰隻試下先，$98。六塊。真係未食過咁UN嘅牛，呢個質素，惠康買啲平價牛肉都好味過佢啦，我咬到一半唔小心又吞左少少，口入面嘅咬極都咬唔完，唯有夾硬吞埋未咬完個一半。完全唔係一般打邊爐肥牛嘅口感。
— 點左蝦滑同墨魚滑，一啲都唔爽口，入口梅梅地嘅感覺，最後食剩好多。
— 醬料費用每人19，佢話包左係茶錢入邊，簡單來講即係一定要比，醬料嘅款式種類正常，係生果好少，種類少份量少，然後有一個電飯煲喺度俾你裝飯，前菜只有海帶。
— 佢嘅飲品係平的，$30唔使有超大杯，但係味道真係幾一半，叫咗個唔知咩翡翠檸檬茶，一啲都唔係檸檬茶嘅味道。好似有啲唔知咩水果係入邊嘅茶。
— 一路食一路睇OpenRice review，見到佢哋話可以打包鴨血同豆腐，我哋完全冇興趣，但有留意到佢有主動同隔離枱問要唔要，佢完全冇問我地，席間同侍應們亦冇任何不愉快事件，睇嚟佢哋呢一個安排係隨機，零系統，佢記得講就講，唔記得講就唔講。
/ 總結 /
有時有啲餐廳，我哋會同朋友講話試下囉，裝修幾靚，試一次就算啦。呢間呀？裝修真係唔係好睇到，因為入面黑蚊蚊，抽氣亦做得唔好，見到有人話個地濕晒，我去個日就尚算還好嘅。
非常極度慶幸要等兩個幾鐘嗰日冇等到，如果唔係等咗兩個幾鐘入座之後遇到呢一種服務，同埋呢一種食物質素，真係 thank you very much。
/ 後話 /
雖然唔係食得好飽，因為我唔想浪費我嘅quota喺呢間餐廳嘅食物上面，但食完之後都去海旁行一行先走啦，見到幾個赤膊上身嘅大隻仔剛跑完步吹水，聽到其中一個話「湊湊？聽講好難食㗎嘛」。其實而家市道又唔好，租左咁大間鋪，裝修都揼本唔算求其，點解服務上唔可以做好啲？有系統少少姐？客人要求好高咩？有時候一分錢一分貨，你標價去到咩位，客人要求就去到咩位，好合理姐，呢個價位，呢種食物質素，唔OK囉。做打邊爐已經唔使烹調技巧，基本上湯底OK嘢食新鮮都合格啦，點解呢啲基本野都搞到一鑊粥咁？
张贴