新釗記 (已結業)

工作非常忙碌, 疲累不堪, 令到師傅嘅心情指數跌到極底, 無晒心機, 最慘係連胃口都冇咩, 唔多想食咁; 但師傅諗深一層, 咁辛苦為咩? 咪就係為兩餐, 冇理由刻薄自己, 所以點都要食餐好!都幾夜, 坦白講咁夜都冇咩好食, 所以焦點就放喺茶餐廳, 而今次師傅就決定黎呢間食店; 入到去發現都幾多人, 不過好彩有位, 一坐底即刻睇下要咩食, 諗左好耐最後師傅柯打左豉椒牛肉飯, 再整多一杯師傅嘅至愛飲品凍檸茶, 而友人就柯打一碗碎牛粥!由於廚房嘅單比較多, 所以豉椒牛肉飯要等成十五分鐘, 呢一點係侍應好心提點; 友人碗碎牛粥好快就到, 都幾大碗, 而師傅有幸一試, 發覺粥底好綿, 加上冇咩精, 都幾好味; 而豉椒牛肉飯份量都幾多, 豉汁非常香口, 唔算油膩, 而牛肉幾鬆夠嫩, 好味; 凍檸茶就不過不失, 可以接受! 總括黎講食物質素頗好, 而服務態度都幾好, 勤力有禮, 地方光猛乾淨, 而價錢都唔算貴, 埋單六六, 都算抵食! 師傅覺得呢間食店嘅質素唔差, 比隔離間咩島好得多, 絕對釗得起; 食左餐幾好味嘅晚餐, 師傅心情都好番好多, 有機會都會再黎, 笑臉值得一比!