珍珠皇宮印度餐廳

重慶雖然有好多印度餐廳，但香港人通常來來去去都係去某兩間，最近去左一間從未去過嘅印度餐廳就俾倒好深刻印象我，因為啲咖哩比起香港好多印度餐廳都要辣，唔會特登較到冇咁辣咁，似返印度人食開嘅辣度，最重要係店面都比較乾淨同企理，食得更放心。

講緊嘅就係珍珠皇宮，佢喺重慶大廈1樓，喺地下中間看更位後面就有樓梯上去。哩度嘅定價比重慶其他印度餐廳貴少少，但基本上人均$150-200已經食到飽。

胡椒餅(免費) - 點完餐侍應就送上一份胡椒餅，好薄好脆，蘸埋辣辣地嘅薄荷醬，惹味又好食。

胡椒餅

炸洋蔥圈($52) - 賣相雖然同想像中有啲出入，不過我反而幾鍾意，因為啲炸洋蔥炸皮冇平時西餐廳食倒嘅咁厚咁硬，好似食緊炸白飯魚咁，係脆得黎軟身嘅，蘸埋佢個甜甜地嘅醬汁味道都唔錯，加上夠大份，如果有叫酒飲嘅叫哩碟炸洋蔥圈就啱晒。

炸洋蔥圈

$52

瑪沙拉煮魚($118) - 瑪沙拉本身的確係應該食倒辣味嘅，不過之前喺香港食過唔少印度餐廳，啲咖哩都較到就返香港人冇咁辣，所以瑪沙拉通常都較到唔辣嘅，但哩度嘅瑪沙拉就真係辣辣地，辣度大約係小辣，鍾意食辣嘅朋友就會覺得惹味好食，如果本身唔食得辣我會建議點椰汁咖哩。

瑪沙拉煮魚

$118

魚塊大約有五六舊，肉質唔會太腍，食倒少少彈口。

瑪沙拉煮魚

$118

蒜蓉烤餅($28) - 烤餅一客有三大塊，好腍好軟身，就算唔想用手，淨係用匙羹同叉都好易切開小塊食。

蒜蓉烤餅

$28

芒果奶昔($35) - 食咖哩當然唔少得一杯芒果奶昔，佢地嘅奶昔都打得幾滑唔會太稀，芒果味好香甜。

芒果奶昔

$35

士多啤梨奶昔($35) - 哩度嘅奶昔都算多口味，除左常見嘅芒果、甜味同咸味奶昔，仲有士多啤梨、香蕉同玫瑰，朋友叫左士多啤梨，酸酸甜甜一啲都唔藥水味，味道唔錯。

士多啤梨奶昔

$35

總結，雖然哩度嘅價錢比重慶其他餐廳貴少少，但環境就乾沬企理好多，張枱唔會立痴痴咁，而且每張枱都有枝酒精搓手液喺度，我最鍾意係佢啲咖哩好夠辣，除左頭先講到嘅瑪沙拉，佢地仲有一款叫勁辣咖哩，有機會都想挑戰下。