千賀水產の鮮鍋道場 (已結業)

香港人對日式放題有幾瘋狂，相信唔使我多講你都知！早在元朗做到街知巷聞嘅放題店，最近開咗分店喺銅鑼灣，對於我等非新界友來說，實在係一大喜訊！夠膽選擇開喺酒店裡面，老闆一定對出品好有信心，至少，酒店老闆都投咗信心一票，租予他們！今晚我哋揀咗龍蝦湯底，上鍋後在等佢滾起之前，即刻奉上刺身拼盤，有三文魚、油甘魚、甜蝦、象拔蚌……之後上埋火鍋配料，有鮑魚、大蝦、蟶子、貴妃蚌、安格斯肥牛……餐牌上仲有肥牛、豚肉、大蝦、魚滑、墨魚滑……可以追加，自助美食區就有響鈴、脆炸魚皮、廚師腸、芝士腸、芝心丸、肉丸、金菇、芋頭、芋絲、南瓜、冬瓜、蘿蔔、生根、韓國麵、一丁麵、烏冬、餐肉、各種蔬菜……10多種醬料任你混……未完，轉下口味又可以食多種熱盤，有蒸魚、糯米飯、牛柳粒、蒜香骨、麻辣鷄、時令熱湯……甜品有布甸、慕絲、芝士蛋糕、Oreo 木糠布甸、韓國雪條、雪米滋……飲品有清潤蔗水、酸梅湯、韓式凍飲如士多啤梨溝鮮奶、廬薈奇異果……放題任食時間不限，由5:30pm坐到10:30pm都得，最啱大伙兒食下chat下慢慢歎，除開平均每位約300元，何止番本，簡直超抵！朋友都話下次再約再食！