米線樂•麻辣豬骨濃湯 (已結業)

去開長沙灣經過呢間米線舖，裝修都好新，而且入邊有好多人食緊，所以我同朋友都唔執輸入去試吓。我哋叫咗兩個主食，朋友就試咗佢主打嘅麻辣豬骨濃湯米線，而配料就揀咗蘿蔔同埋黃金花枝丸，湯底十分濃郁而且米線同配料嘅份量都十分之多，蘿蔔清甜，非常出色。而另一個主食就嗌咗招牌涼拌粉皮，佢原本嘅配料有芫荽、炸黃豆、青瓜絲同埋麻醬，而配料我就揀咗滷水雞腎同埋滷水豬大腸，想讚一讚呢間餐廳嘅滷水真係好出色，非常之入味，而且份量都超多，呢個價錢來講，簡直物有所值。我哋亦都帶咗兩個小食，分別係麻辣墨魚咀拼軟骨，同埋蒜泥白肉。喺出邊好少可以食到墨魚咀軟骨，識落非常之有𡁻口，配埋個麻辣汁簡直係非常夾。而蒜泥白肉份量都唔少，腩肉肥瘦適中，絕對值得一試。飲品方面我哋聽咗老闆嘅建議，嗌咗玫瑰洛神花茶同埋蜜桃烏龍茶。呢度嘅凍飲係用膠樽載住，兩款都係無添加糖， 好健康！