四爺車仔麵專門店 (已結業)

灣仔車仔麵越開越多，喺譚臣道嘅另一邊，開咗依間四爺車仔麵，主打無味精湯底。座位寬落，明亮嘅室內環境，同一般車仔麵檔嘅氣氛好唔同。依度仲有唔同嘅，係車仔餸預設係分開上。麵食包嘢飲，餸嘅價錢就比較貴少少，除咗湯麵仲有撈麵可以揀。嗌咗四餸加麻辣湯底，麻辣湯實際上唔算辣，但勝在夠香，食完唔渴喉，認真冇味精。幼麵份量夠多，食完真係夠飽個種。韭菜餃偏多肉餡，皮嘅厚度適中，餡香。時菜多選擇，仲有竹笙添。麵本身配有芽菜同木耳，口感更為豐富。魷魚份量唔少，有鬚有肉身，沙嗲入味，偏軟身。最驚喜係糖心蛋，甜豉油滷得入味之餘，蛋黃又真係香稠，啲汁仲可以撈麵食。嘢飲基本茶餐會有嘅都有，揀咗熱檸蜜，甜度適中，檸檬唔澀口。四爺地點就腳，店面又企理，不失為喺灣仔食飯嘅選擇之一。