真味日本料理 (已結業)

有個成語叫「物極必反」，我諗小學生都識點解，就係世事去到某個限度就真係夠晒，再多就真係多咗，好事都變壞事。今晚於荃灣搵食，想食壽司，諗起兆和街有間日本料理晚晚要等位，一於就去試吓。時間尚早但都要等位，好在稍為輪候已可入座。於門口相片已得知此店原來又係「以量取勝」嘅元朗「田中系」日本料理，仲自稱「大棉胎」壽司，都唔敢貪心亂叫食物。每檯必點嘅「超巨型三文魚刺身」送到桌上，真真正正地O嘴，原來呢個世上竟然有刺身比田中仲要厚切，幾乎成寸厚，好恐怖!五巨片加埋肯定唔止半磅，賣$55一碟當然係抵食，但「求學並非求分數」，進食亦都並非求磅數，食嘢其實真係唔係純粹飽肚就好囉。三文魚刺身唔夠肥，質素平平，單係一件刺身已經食到人滯晒，食唔落其他嘢，為乜呢?今晚同時食咗火炙三文魚和帶子壽司以及煙肉三文魚炒飯，全部都係超巨型相撲手級別。火炙過後的三文魚充滿油香，炒飯亦都出乎意料地相當好味，不過份量全部都太過份地大份喇。既然出品質素唔差，與其質飽客人個肚，倒不如每樣食物都細份少少，好讓客人多點幾款食物好過啦。呢間食肆算係介乎笑同OK之間啦，食量唔大嘅話就奉勸唔好去喇，叫咗食唔落好浪費的。