一門 (已結業)

星期日再與另一老友慶祝，今次由老友介紹。水果茶-好似煲熱o左的雜果賓治，侍士姐姐話有龍眼肉、菠蘿、蘋果、檸檬同雪梨一齊煲，唔怪得味道好清甜好好飲。牡丹蝦-初時以為76蚊兩隻，都唔會好食的去邊。點知唔錯喎，幾大隻，蝦肉彈呀、好有milky感覺，而蝦頭好大，雖然唔太多膏，但係好鮮味。一門沙律-雖然都係做一般西洋沙律菜，但最特別係d沙律汁，味道似點海蜇分蹄個d醬汁。東洋卷-日本菜多數用紫菜來包的，呢個卷係用pancake皮包住牛油果、蟹籽同鰻魚，個皮微暖、好軟熟、好得意。泡菜豚肉石頭飯-又係推介之一，味道與正宗韓式料理沒有分別，上台時個石頭鍋仲有”吱吱”聲，有好多泡菜，辣度適中，又有唔少飯焦，我連添兩碗，不過豚肉較肥，好彩份量唔算多。河蝦煎蛋燒餅-雖然蝦同菜好多，又唔會有好多粉團，煎得又唔算太油，但係就冇味。老友果然冇介紹錯，除了燒餅比較一般之外，其餘都好有水準。唔怪得剛去到時有8成滿，我o地冇訂台，所以要我o地準時交台，臨走時仲全院滿座，呢間值得翻炒。