S2 Kitchen (已搬遷) 新店位置

中環可謂臥虎藏龍，常常係小巷發現意想不到既餐廳，今日機緣巧合之下去左呢間S2 Kitchen。餐廳面積幾細，大約得六至七張枱，但未算擁擠。牆身掛上多張香港景色既油彩畫。一開始先送上牛舌小食，配上餐廳特製醬汁相當惹味。日本蕃茄沙律無乜特別，唯一想講係蕃茄的確好甜。黑松露白身魚薄切配搭出色，白身魚本身味道較淡，黑松露能夠提升魚既鮮味。另外亦加上金箔，帶來一定既視覺享受。秋葵卷既外皮好脆口，十足天婦羅既口感，入面就係爽甜既秋葵，整體非常清新。厚燒牛舌總共有四件，每件好厚身，外皮燒到微焦既型態，肉質好軟稔。芝麻雞翼特別香氣四溢，外皮超脆，肉質嫩口兼多汁。油菜炒飯粒粒分明，唔油膩，撈勻蛋黃後更滋味。甜品係芝士蛋糕，口感非常輕盈，淡淡的青檸有助減少膩度。經師傅介紹下，我叫左呢支名為雪既清酒，瓶身設計相當討好，味道甜甜地，非常順口，幾適合女仔飲用，或者好似我咁酒淺既男仔。坐係吧枱既我可以見到師傅製作美食既過程。師傅全程有互動，不過最難忘係製作食物時既認真，期待下次食到S2 kitchen最出名既海膽杯。