北京樓 (德福廣場1期)

营业中

休息中

臨近新年，幾個同事打算食個中餐做下節，貪北京樓既環境坐得舒適，而且除左小菜外仲有南北方點心選擇，款式夠多。今次就冇試佢係北京填鴨，反而叫左幾款點心同麵食，點心幾有驚喜，好足料。大鹵麵：粗拉麵麵質煙靭，唔會煮得太爛，但鹵料嘅味道就唔算好啱口味，雖然唔會好鹹，但只係食到一陣豉油味。沙嗲金錢肚：呢個點心基本上係同事每次嚟必點嘅，金錢肚夠爽脆入味，用埋面根墊底，索哂d沙嗲汁👍蜜汁叉燒蒸腸粉：腸粉皮夠薄同滑，餡料可以食到粒粒叉燒，配埋芫荽好香口。沙律明蝦角：外皮炸得好鬆脆，餡料勁足，放左好多粒蝦，而且粒粒都好新鮮彈牙。百花釀魚肚：魚肚份量唔算多，但質地軟綿鮮嫩，蝦膠爽口彈牙，算係比較清淡口味既甜心之選。小籠包：不過不失，一定要趁熱食，放耐少少個皮就好易變硬。